ބައެއް މީހުންނަކީ، ޤާނޫނުތަކުގައި ބުނަނީ ކީކޭތޯ ބަލައިގެން އެބައިމީހުންގެ ދޭދޭދިރިއުޅުމުގެ މަސައްކަތްތައް ބައްޓަންކުރަމުންދާ ބައެއްނޫނޭ ބުނުމަކީ މުޅިންގޯހެއް ކަމުގައި ވާނެކަމަކަށް ނުފެނެއެވެ. ރުޅިއަރައިގެން ތެދުވެ ހަށިފޮޅާލާފައި ބުނާއެއްޗެއް ބުނެލާނީ ޤާނޫނަކުން ނުވަތަ ޤަވާޢިދަކުން ވިޔަސް އެމީހުން ކުރަން އުޅޭކަމަކަށް ހުރަހެއް އެޅޭވަގުތުއެވެ. ނުވަތަ އެކުރިކަމެއްގެ ނަތީޖާއެއްގެ ގޮތުން ހައްޔަރެއްވެ ސުވާލެއްވުމުން ނޫނީ ކޮންމެވެސް އަދަބެއް ލިބޭވަގުތުއެވެ. މިކަންވެސް އިސާހިތަކު އެމީހުންގެ ހަދާނުން ނެތިގޮސް ކުރިން އުޅެމުންދިޔަ ބައްޓަމަށް ފެތިދެއެވެ. މިއީ އަޅުގަނޑު ހިތުން އަޅުގަނޑުމެންގެ ތެރެއިން ފިލުވައިލަންޖެހިއްޖެ އާދައެކެވެ. ޤާނޫނުތަކާއި މެދު ހޭލުންތެރިވުމާއި އެއާއި އެއްގޮތަށް ދިރިއުޅުމުގެ ކަންކަންރާވައި ހިންގުމުގެ އާދަ އަށަގަންނުވަންވެއްޖެއެވެ. މިގޮތުން ޤާނޫނުތަކަކީ ޤައުމުގެ ރައްޔިތުންނަށް އަމާޒުކޮށްހެދޭ އެއްޗަކަށްވާތީ، ޤާނޫނު ޤާނޫނަކަށްވުމުގެ ކުރިން، އާދެ ބިލެއްގެ ސިފައިގައިވާ މަރުޙަލާއިންފެށިގެން އޭގައި ލިޔެފައިވާ އެއްޗަކާއިމެދު ބަލައި ވިސްނައި ހޭލުންތެރިވާން ފަށަންވެއްޖެއެވެ. ސަބަބަކީ ބިލެއް ޤާނޫނަކަށް ވުމުގެ ނަތީޖާއަކީ ރުހުނަސް ނުރުހުނަސް އެއާއި އެއްގޮތަށް ރަށްޔިތުންގެ ޢަމަލުތައް ދީލާލަން މަޖުބޫރުވުމެވެ. މިގޮތުން މިހާރު ބަހުޘްކުރެވެމުންދާ ދިވެހިރާއްޖޭގެ ޤާނޫނުލްޢުޤޫބާތުގެ ބިލަކީ ދިވެހިން އެބިލަކާއިމެދު ހޭލާންވެއްޖެ ބިލެކެވެ. އެތައްސަބަބަކަށްޓަކައެވެ. މިއީ ނޫރުލްއިސްލާމް ވެބްސައިޓުގައި 17 އޮކްޓޯބަރ 2009 ގައި ޝާއިޢު ކުރެވުނު ލިޔުމެކެވެ. ޤާނޫނު ޢުޤޫބާތު ކޮމެޓީ މަރުހަލާ ނިމި މަޖިލީހުގެ ތަޅުމަށް އަންނަ ޚަބަރު ލިބިފައިވާ މިދަނޑިވަޅުގައި މުހިއްމު ލިޔުމެއް ކަމަށް ފެންނާތީ، ދެވަނަ ފަހަރަށް ޝާއިޢު ކުރީއެވެ.